- Wednesday, 27 June 2012 01:22
ភ្នំពេញ: សម្តេចក្រុមព្រះ នរោត្តម រណឫទ្ធិ ប្រធានគណបក្សនរោត្តម រណឫទ្ធិ បានមានបន្ទូលថា នៅពុំទាន់មានការអនុវត្តលើកិច្ចព្រមព្រៀង រវាងគណបក្ស នរោត្តម រណឫទ្ធិ និងគណបក្សហ្វ៊ុនស៊ិនប៉ិច កាលពីថ្ងៃទី២៤ ខែឧសភា ឆ្នាំ២០១២ បែរជាមានក្បត់នៃកិច្ចព្រមព្រៀងពីសំណាក់លោកញឹកប៊ុនឆៃ។ ការបែកបាក់នោះ ក៏មិនមែនព្រះអង្គ ងាកទៅធ្វើគណបក្សប្រឆាំងដែរ។សម្តេចក្រុមព្រះ នរោត្តម រណឫទ្ធិ មានបន្ទូលទៀតថា លោកញឹកប៊ុនឆៃ បាននិយាយថា ការរួបរួមទាល់តែគ្មានសម្តេចក្រុមព្រះ។ សម្តេចតា សម្តេចតាទួត បានសរសេលិខិតមកព្រះអង្គ កាលពីថ្ងៃទី២៧ ខែឧសភា ( លោកបានមានព្រះរាជព្រះឱង្កាព្រះអង្គសប្បាយណាស់ លោកទទួលយកដោយមហារីករាយនៅការវិលត្រឡប់ទៅអតីតកាលដ៏រុងរឿង នៃគណបក្សហ្វ៊ុនស៊ីនប៉ិច)។
ព្រះអង្គបានបន្ថែមថា ដោយសារទង្វើរបស់លោកញឹកប៊ុនឆៃ ដោយសារលក្ខណៈ ហ្វ៊ុនស៊ិនប៉ិច របស់លោកញឹកប៊ុនឆៃនោះ ព្រះអង្គមានបន្ទូលថា យើងពុំអាចវិលត្រឡប់ទៅរកគណបក្សហ្វ៊ុនស៊ិនប៉ិច ថ្កុំថ្កើងរុងរឿងបានទេ គឺពេលណាមានលោកញឹកប៊ុនឆៃ ជាប្រធាននៃគណបក្ស។
សម្តេចក្រុមព្រះមានបន្ទូលបន្តថា ការចុះកិច្ចព្រមព្រៀងជាមួយគណបក្សនរោត្តមរណឫទ្ធិកាលពី ថ្ងៃទី២៤ឧសភា គ្រាន់តែតំណាងហ្វ៊ុនស៊ីនប៉ិចនោះ អត់ខាងលោកកែវពុទ្ធរស្មី ឃើញមានមកចូលរួមផង ដូចជាគណបក្សបែកបាក់គ្នា។
សម្តេចក្រុមព្រះ មានបន្ទូលបញ្ជាក់ថា "ខ្ញុំចង់ណាស់ចង់វិលត្រឡប់ទៅដឹកនាំគណបក្សហ្វ៊ុនស៊ិនប៉ិច របស់សម្តេចតាសម្តេចតាទូតឡើងវិញ ចង់ប្របែប្រមូលអ្នករាជានិយម ប៉ុន្តែគ្មានលោកញឹកប៊ុនឆៃ”។
សម្តេចក្រុមព្រះ នរោត្តម រណឫទ្ធិ បានបន្ថែមថា មានតែលោកញឹកប៊ុនឆៃ តែមួយគត់ ដែលប្រកែក មិនព្រមប្រគល់ហ្វ៊ុនស៊ិនប៉ិច មកឲ្យព្រះអង្គ។ តែទោះបីជាយ៉ងណាក៏ដោយ ព្រះអង្គនៅតែមានសង្ឃឹម ចូលមកដឹកនាំហ្វ៊ុនស៊ិនប៉ិចបានវិញ នៅឆ្នាំ២០១៣ខាងមុខ។
ជាមួយនោះដែរ សម្តេចក្រុមព្រះ ឆ្លៀតធ្វើការអំពាវនាវឲ្យមន្ត្រីហ្វ៊ុនស៊ិនប៉ិច ចាកចេញពីហ្វ៊ុនស៊ិនប៉ិច ចោលលោកញឹកប៊ុនឆៃ យកមករួមជាមួយព្រះអង្គម្តង ក្នុងការប្រមូលអ្នករាជានិយម និងរួបរួមជាមួយគណបក្សប្រជាជនកម្ពុជា ដែលកំពុងកាន់អំណាច។
ក្នុងពិធីសំណេះសំណាលជាមួយសកម្មជន គណបក្ស នរោត្តម រណឫទ្ធិ នៅព្រឹកថ្ងៃអង្គារទី២៦ ខែមិថុនា ឆ្នាំ២០១២ សម្តេចក្រុមព្រះ នរោត្តម រណឫទ្ធិ ក៏បានបដិសេធជាថ្មីម្តងទៀតថា ព្រះអង្គ នឹងមិនទៅចូលជាមួយគណបក្សប្រឆាំងទេ។
សម្តេចក្រុមព្រះ នរោត្តម រណឫទ្ធិ បានមានបន្ទូលបដិសេធថា ព្រះអង្គមិនដែលគិតថា ទៅចូលជាមួយគណបក្សប្រឆាំង ដូចការចោទប្រកាន់របស់លោក ញឹក ប៊ុនឆៃ នោះឡើយ។
សម្តេចក្រុមព្រះបានលើកហេតុផលពីរយ៉ាងមកសម្អាងគឺ ទី១ ប្អូនរបស់ព្រះអង្គ គឺព្រះមហាក្សត្រ នរោត្តម សីហមុនី និងព្រះបិតា សម្តេចឪ នរោត្តម សីហនុ កំពុងគង់នៅជាមួយគណបក្សប្រជាជនកម្ពុជា។ ដូច្នេះ ព្រះអង្គ មិនអាចទៅនៅជាមួយបក្សប្រឆាំងបានទេ។ ទី២ ព្រះអង្គទតឃើញថា បក្សប្រឆាំង មិនអាចកែប្រែអ្វីបានឡើយ។
ជុំវិញការលើកឡើងរបស់សម្តេចក្រុមព្រះ នរោត្តម រណឫទ្ធិ ខាងលើនេះ ត្រូវបានលោក ញឹក ប៊ុនឆៃ ច្រានចោល ហើយថា សម្តេចក្រុមព្រះ នរោត្តម រណឫទ្ធិ ទេ ដែលជាអ្នកធ្វើឲ្យបែកបាក់សម្ព័ន្ធភាពគណបក្សរាជានិយមទាំងពីរ ជាថ្មីទៀតនោះ៕ ដោយ: រតនា
( ខ្មែរស្ថាបនា)
0 comments