រាជធានីភ្នំពេញៈ អង្គជំនុំជម្រះតុលាការកំពូលនៃសាលាក្តីខ្មែរក្រហមបាន ប្រកាសសាលដីកាស្ថាពរបិទផ្លូវតវ៉ាលើសំណុំរឿង០០១ ប្រឆាំងនឹងកាំង ហ្កេកអ៊ាវហៅឌុច អតីតប្រធានគុកទួលស្លែង ដាក់ពន្ធនាគារអស់មួយជីវិត ។
ការប្រកាសសាលដីកានេះ ធ្វើឡើងលោកចៅក្រមគង់ ស៊ីម ប្រធានអង្គជំនុំជម្រះតុលាការកំពូល ដែលអង្គជំនុំជម្រះនេះមានចៅក្រម៧រូប ក្នុងនោះចៅក្រមអន្តរជាតិចំនួន៣រូប ។
ក្នុងសវនាការកាលពីព្រឹកថ្ងៃទី៣ កុម្ភៈ លោកចៅក្រមគង់ ស្រ៊ីមបានអានសាលដីកាប្រកាសសម្រេចដាក់ទោសឌុច ដាក់ពន្ធនាគារមួយជីវិត និងថាការដាក់ទោស៣៥ឆ្នាំ ដោយអង្គជំនុំជម្រះសាលាដំបូង មិនបានឆ្លុះបញ្ចាំងឲ្យបានសមស្របទៅនឹងស្ថានទម្ងន់ និងស្ថានភាពបុគលកាំង ហ្គេកអ៊ាវហៅឌុច នោះឡើយ ។ អង្គជំនុំជម្រះសាលាដំបូងពិតជាមានកំហុសក្នុងការប្រ កាសទោស ដែលមានលក្ខណៈមិនគ្រប់គ្រាន់យ៉ាងច្បាស់ក្រឡែត ។
កាំង ហ្កេកអ៊ាវ ហៅឌុច អាយុ៧០ឆ្នាំ ជាអ្នកទទួលខុសត្រូវគុកទួលស្លែងហៅមន្ទីរស២១ ក្នុងរបបខ្មែរក្រហម ដែលបានធ្វើទារុណកម្ម និងសម្លាប់មនុស្សរហូតជិត២ម៉ឺននាក់ ចន្លោះពីថ្ងៃទី១៧ មេសា ១៩៧៥ ដល់ថ្ងៃទី៦ មករា ១៩៧៩ ។
បន្ទាប់ពីការសម្រេចផ្តន្ទាទោសដាក់ពន្ធនាគារ៣៥ឆ្នាំ របស់សាលាដំបូងក្នុងសំណុំរឿង០០១ នៃតុលាការនេះ គឺត្រូវបានប្តឹងទាស់ដោយដើមបណ្តឹងរដ្ឋប្បវេណី សហព្រះរាជអាជ្ញា និងមេធាវីការពារឌុច ហើយកាលពីថ្ងៃទី២៨ ដល់ ថ្ងៃទី៣១ មីនា ២០១១ អង្គជំនុំជម្រះតុលាការ កំពូលបានបើកសវនាការលើបណ្តឹងសាទុក្ខ និងបានប្រកាសសាលដីកាស្ថាពរនាព្រឹកថ្ងៃទី៣ កុម្ភៈ ២០១២ នេះ ៕
0 comments